• Os materiais mesoporosos ordenados de sílice son unha innovadora área de investigación que combina a ciencia de materiais con aplicacións farmacéuticas avanzadas.

 Santiago de Compostela, 4 de xullo de 2024.- O doutor Antonio L. Doadrio Villarejo tomou posesión este xoves 4 de xullo como Académico Correspondente da Real Academia de Farmacia de Galicia. Os “Materiais Mesoporosos Ordenados de Sílice para Liberación de Fármacos: Unha Visión ‘In Silico'” foi o título do discurso pronunciado polo novo académico, no acto que tivo lugar na sede da RAFG, no que o doutor Manuel Puga Pereira, Académico de Número, ofreceu un discurso de presentación destacando a traxectoria e as contribucións do Dr. Doadrio Villarejo ao campo da farmacia.

Na súa intervención, Antonio L. Doadrio Villarejo explorou o potencial dos materiais mesoporosos ordenados de sílice na liberación controlada de fármacos, unha innovadora área de investigación que combina a ciencia de materiais con aplicacións farmacéuticas avanzadas. Tamén destacou como estes materiais, grazas á súa estrutura porosa e a súa capacidade de absorción, poden mellorar significativamente a eficacia e a precisión na administración de medicamentos.

Ademais, o doutor Doadrio Villarejo presentou unha visión “in silico”, subliñando a importancia das simulacións computacionales no deseño e a optimización destes sistemas de liberación de fármacos. Esta aproximación permite prever o comportamento dos materiais e optimizar as súas propiedades para aplicacións específicas, o que representa un avance significativo na investigación farmacéutica.

Tal e como explicou o novo Académico Correspondente da RAFG, a estrutura porosa destes materiais pode actuar como pequenos depósitos de fármacos, podendo liberalos de maneira controlada e gradual, o que é de gran utilidade para tratamentos que necesitan que o fármaco se libere exactamente onde e cando se necesita. Igualmente, os materiais mesoporosos de sílice tamén se poden utilizar en sensores para detectar certas enfermidades. Debido á súa capacidade para capturar diferentes moléculas, poden axudar a identificar a presenza de biomarcadores específicos que indican enfermidades.

A traxectoria do novo académico conxuga as actividades que son propias dun profesor e investigador universitario, catedrático da Universidade Complutense de Madrid moi destacado no ámbito das Ciencias Farmacéuticas, coas de Académico Numerario da Real Academia Nacional de Farmacia, da que é Presidente. Desde esa institución promove a difusión da contribución da Farmacia ao Sistema Sanitario e o seu papel determinante para a calidade de vida das persoas.

Previous articleToma de posesión D. Antonio Doadrio Villarejo como Académico Correspondente