Real Academia de Farmacia de Galicia

Os académicos residentes en Galicia da Real Academia de Farmacia -na actualidade Real Academia Nacional de Farmacia- solicitan a creación dunha sección de ámbito galego co fin de lograr localmente mellores resultados no desenvolvemento e difusión das ciencias farmacéuticas.

Acordo unánime da Xunta de Goberno da Real Academia de Farmacia de atender a demanda, instando aos académicos solicitantes a elaborar un proxecto de regulamento que contemple as peculiaridades da Sección; proxecto que é redactado e remitido á Real Academia con data 5/7/1993.

Nomeamento por parte da Xunta de Goberno da Real Academia de Farmacia dunha comisión para a avaliación do proxecto de regulamento, integrada polo académicos D. Ángel Santos Ruiz como presidente, D. Juan Manuel López de  Azcona e D. Ángel Vián  Ortuño como vogais, e D. Antonio  Portolés Alonso como secretario.

A Xunta Xeral da Real Academia de Farmacia acorda por unanimidade a creación da Sección Galicia, apróbase o seu regulamento, e pasan a formar parte dela, en calidade de Xunta Xestora, o académico de número D. José Miñones Trillo e os académicos correspondentes, por orde de antigüidade, D. Benito Regueiro Varela, D. José Luis Vila Jato, D. José María Calleja Suárez, D. Jesús Izco Sevillano, D. Francisco Díaz-Fierros Viqueira e D. Enrique Raviña Rubira, todos eles con residencia en Galicia. No acordo indícase que “En el futuro, cuando esta Sección Delegada tenga mayor número de académicos y alcance el auge suficiente, podrá convertirse en entidad académica independiente”.

Nomeamento dos cargos directivos da Xunta Xestora a favor de D. Jesús Izco Sevillano, Presidente, D. José María Calleja Suárez, Secretario, e D. Enrique Raviña Rubira, Tesoureiro.

En sesión solemne celebrada no Pazo de Fonseca, antiga sede da Facultade de Farmacia da Universidade de Santiago de Compostela, celébrase o acto de presentación pública da Sección, coa asistencia das máximas autoridades galegas e da Real Academia de Farmacia. Desde este momento empeza a desenvolver o seu propio programa científico e incorpóranse os seus primeiros membros de número. Máis información.

Tras a toma de posesión como académicos de número de tódolos compoñentes da Xunta Xestora, solicítase á Real Academia de Farmacia a segregación da Sección para constituírse, segundo o acordado, como entidade propia e independente da súa matriz.

A Real Academia de Farmacia, aproba por unanimidade, co apoio e a valoración positiva do Instituto de España (17/1/2002), a proposta de segregación e consecuente creación da Academia de Farmacia de Galicia como institución independente.

En virtude das competencias asumidas pola Comunidade Autónoma de Galicia en materia de Academias, e unha vez regulado o exercicio das mesmas, a Xunta de Galicia aproba con carácter oficial a creación como entidade de seu da Academia de Farmacia de Galicia, a súa incorporación ao Rexistro Xeral de Academias galegas, a súa adscrición á Consellería de Sanidade, o ámbito da súa actuación e os seus estatutos (DOG de 19/7/2004).

Consonte aos novos estatutos elíxese unha primeira Xunta de Goberno integrada por D. Isaac Arias Santos, Presidente e D. Manuel Puga Pereira, Secretario.

En sesión solemne celebrada no Antigo Hospital de San Roque de Santiago de Compostela preséntase a Academia de Farmacia de Galicia. No devandito acto, co que se inicia o curso académico 2006, pronuncia a lección inaugural D. Jesús Izco Sevillano na que relata os antecedentes da institución. Máis información.

Finalizado un primeiro mandato, a Xunta Xeral reelixe a D. Isaac Arias Santos e D. Manuel Puga Pereira como Presidente e Secretario, respectivamente, e a D. Nicanor Floro Andrés Rodríguez como Tesoureiro.

Tras o correspondente proceso electoral celebrado de acordo cos estatutos elíxese unha nova Xunta de Goberno integrada por D. Manuel Puga Pereira, Presidente, Dña. Soledad Muniategui Lorenzo, Secretaria y D. Ángel Concheiro Nine, Tesoureiro, que toma posesión o 19/2/2014 na sesión pública de apertura de curso.

Por acordo unánime da Xunta Xeral, apróbase o primeiro Regulamento de Réxime Interior que desenvolve e complementa os contidos expresados nos estatutos da Academia de Farmacia de Galicia.

Transcorrido o período regulamentario, resultan reelixidos D. Manuel Puga Pereira, Presidente, Dña. Soledad Muniategui Lorenzo, Secretaria e D. Ángel Concheiro Nine, Tesoureiro.

A pedimento da Presidencia da Institución, S.M. o Rey de España Felipe VI concede o título de Real á Academia de Farmacia de Galicia (credencial nº 186/2019).

Por Acordo do Consello da Xunta de Galicia, apróbase oficialmente a modificación dos estatutos da Real Academia de Farmacia de Galicia (DOG de 22/11/2019), que foran aprobados previamente por unanimidade en Xunta Xeral extraordinaria celebrada o 29/05/2018.

A Junta Rectora do Instituto de España, na súa reunión ordinaria do día 26 de xaneiro de 2021, acordou admitir á Real Academia de Farmacia de Galicia como academia asociada ao Instituto de España.

Tras o correspondente proceso electoral de acordo cos estatutos, elíxese unha nova Xunta de Goberno integrada por D. Ángel Concheiro Nine, Presidente; Dña. Mª Isabel Loza García, Vicepresidenta; Dña. Carmen Álvarez Lorenzo, Secretaria; Dña. Soledad Muniategui Lorenzo, Tesoureira e D. Jorge Barros Velázquez, Bibliotecario, que toma posesión en sesión pública celebrada o 28/11/2022.